Kleiner klasse, groter voordele

Oorvol klasse is ’n algemene uitdaging in skole regoor die wêreld. Dit lei dikwels tot minder individuele aandag, die moontlikheid van hoër geraasvlakke en ’n minder doeltreffende leeromgewing. Leerders in groot klasse voel dikwels verlore in die massa, en onderwysers sukkel om by elke kind se unieke behoeftes uit te kom. Gelukkig is dit nie die geval by Gereformeerde Skool Dirk Postma nie. Met ’n gemiddelde klasgrootte van slegs 25 leerders, bied die skool ’n leeromgewing waar persoonlike aandag en optimale akademiese ondersteuning moontlik is.

Navorsing bevestig dat kleiner klasgroepe ’n wesenlike verskil maak in die kwaliteit van onderrig. Volgens Nadia Human (2004:5) is kleiner klasse ideaal vir groepwerk wat noodsaaklik is vir effektiewe leer. In kleiner groepe kan leerders beter saamwerk, meer betrokke raak by klasaktiwiteite en makliker vrae vra. Dit bevorder nie net hul akademiese groei nie, maar ook hul sosiale en kommunikasievaardighede.

’n Kleiner klas beteken ook dat onderwysers meer tyd het om elke leerder se vordering en karaktervorming dop te hou. Volgens Ehrenberg et al. (2001:1-3) beïnvloed klasgrootte direk die onderwyser se vermoë om sy of haar tyd effektief te bestuur. In kleiner groepe kan onderwysers meer gefokusde terugvoer gee, leerders se sterk- en swakpunte beter identifiseer en verskillende leerstyle akkommodeer. Dit help leerders om op hul eie tempo te vorder en verminder die risiko dat sommige agter raak sonder dat dit opgemerk word.

Harfitt en Tsui (2015:845) se navorsing toon dat leerders in kleiner klasse meer gemotiveerd en betrokke is. Hulle voel gemakliker om deel te neem aan klasbesprekings, en die leerproses word meer interaktief en dinamies. Hierdie tipe omgewing dra by daartoe dat daar in ‘n skool soos Dirk Postma op ‘n gemaklike wyse geloofsgesprekke gevoer kan word. Leerders het die geleentheid om in ‘n veilige omgewing apologetiese vaardighede te kan ontwikkel, vaardighede wat baie nodig is, as hul na skool in ‘n tersiêre omgewing, hul geloof moet verdedig.

Behalwe akademiese voordele, het kleiner klasse ook ’n positiewe invloed op leerders se emosionele welstand. Minder geraas en afleidings skep ’n kalmer, meer gestruktureerde omgewing waar leerders beter kan fokus en minder stres ervaar. Studies toon selfs dat skole met kleiner klasgroepe dikwels minder gedragsprobleme het, aangesien leerders meer individuele aandag kry en hul behoeftes beter verstaan en geakkommodeer word.

Kleiner klasgroepe bied dus nie net akademiese voordele nie, maar ook emosionele en sosiale voordele. Dit skep ’n ondersteunende, gestruktureerde leeromgewing waar elke leerder se volle Godgegewe potensiaal ontsluit en ontwikkel kan word. By Gereformeerde Skool Dirk Postma is hierdie beginsel ’n belangrike onderdeel van die skool se filosofie – en die positiewe uitwerking daarvan is duidelik sigbaar in hul leerders vorming sowel as die groei en toeneem in kennis en wysheid.

Bronne geraadpleeg:

Ehrenberg, R.G., Brewer, D.J., Gamoran, A. & Willms, J.D. 2001. Class size and student achievment. American Psychological Society, 2(1):1-3).

Harfitt, G, J. & Tsui, A.B.M. 2015. An examination of class size reduction on teaching and learning process: a theoretical perspective. British Educational Research Journal, 41(5):845.

Human, N.E. 2004. Die impak van faktore wat leerfasilitering en die maksimalisering van menslike potensiaal onderdruk. MA: Verhandeling. UP.