Spel as onderrigmetode in die kleuterskool

By Dirkieland is dit vir ons belangrik om die maats te onderrig in die weë van die Here. Die gesin en die skool en die kerk werk in elke fase van hierdie skool saam om die kinders aan ons toevertrou, te versorg, op te voed en toe te rus vir hulle lewenstaak. Hierdie vorming begin in die gesin, reeds voor geboorte en word onder andere ook in die skool voortgesit. In die kleuterskool is goed toegeruste onderwysers wat die behoeftes van die kleuter verstaan. Deur ouderdomsgepaste aktiwiteite en roetines word hulle onderrig, gekoester en versorg.

Dit is hier, waar kleuters in ooreenstemming met wat in die gesin gedoen word, liefde in oorvloed ontvang en ervaar, wonderlike vriendskapsbande bou en sosialiseer, waar elkeen leer dat hulle uniek en spesiaal is en waar elkeen speel-speel leer. Die norme en waardes vanuit die Skrif is baie belangrik en dit vloei deur al die leerareas asook die interaksie met mekaar.

Om al spelende te leer is baie belangrik, aangesien dit die kleuters se fisiese, kognitiewe en emosionele ontwikkeling bevorder.

Kleuters leer deur te speel en sodoende word die volgende ontwikkel:

1. Fisiese ontwikkeling

• Spel soos hardloop, klim en balspel verbeter spierbeheer, balans en koördinasie. Fynmotoriese vaardighede ontwikkel deur blootstelling aan aktiwiteite soos blokkies bou, teken en knip.
• Om teen ‘n tou op te klim is ‘n wonderlike fisiese aktiwiteit en hou baie voordele vir hul ontwikkeling in.  Klim help kinders om hul hande en vingers te gebruik vir greep, sowel as hul arms en bene vir koördinasie.

2. Kognitiewe ontwikkeling

• Probleemoplossingsvaardighede word ontwikkel wanneer kleuters raaisels oplos of bouprojekte aanpak.
• Speel bevorder kreatiwiteit en verbeelding – veral in rolspel en kunsaktiwiteite.
• Basiese wiskunde- en taalbegrippe word versterk deur tel, sorteer en gesels tydens speel.
• Om klanke met klei te vorm is ‘n wonderlike manier om leer en speel te kombineer.

3. Emosionele ontwikkeling

• Speel help kinders om emosies uit te druk en te verwerk, bv. deur met poppe of ander speelgoed te speel.
• Dit bou selfvertroue wanneer kinders nuwe vaardighede bemeester en sukses behaal.

4. Sosiale ontwikkeling

• Kleuters leer om te deel, om te wen en te verloor, en om saam te werk in groepaktiwiteite.
• Konflikhantering en kommunikasievaardighede ontwikkel deur interaksie met maats.
• Waterspel is nie net pret nie, maar help ook met verskeie aspekte van ‘n kind se groei

5. Verbeelding en kreatiwiteit

• Fantasiespel (soos “huis-huis” of “skool-skool”) help kinders om sosiale rolle te verstaan en hul kreatiwiteit te ontwikkel.
• Dit leer hulle om oplossings te vind vir uitdagings bv tydens konstruksiespel.
• Tydens die skeppende aktiwiteite leer hulle om planne te maak met al die interessante mediums tot hul beskikking. Sodoende kan elke kleuter sy eie unieke weergawe van die opdrag uitvoer.

Kortom: Speel is nie net tydverdryf nie – dit is die manier waarop kleuters leer, groei en hul plek in die wêreld verstaan.